نصائح للمذاكرة

 نصائح للمذاكرة الصحيحة بدون نسيان 

إزاى افتح نفسى على المذاكرة من وجه نظرى: سمى الله وامسك كتابك وشوف ايه اكتر درس انت مذاكره كويس وذاكره تانى وكأنك اول مرة تذاكره فهتلاقى مخك تلقائي بيسمع الدرس لوحده فهتتشجع انك تذاكر دروس كمان وكمان ودى طريقه كنت بعملها وانا فى تالته ثانوى حاجه كدا شبه التسخين فى الملعب 

مكتبى 💙😅

مذاكرة درس اول مرة تذاكره:

اولا:تقرأ الدرس كله من اوله لأخره بتركيز وفهم 

ثانيا قسم الدرس لفقرات عشان يبقى سهل عليك فى التذكر بعد كدا ،

ثالثا اشرح كل فقرة لنفسك بصوت عالى وحط اسئله عليها فى كشكول خارجى وجاوب عليها بنفسك أثناء الشرح ومتسبش ولا سطر من غير ما تحط عليه سؤال وتجاوبه 

رابعا بقى ودى الخطوة شبه الاخيرة ألا وهى التكرار بصوت عالى كرر الفقرة مثلا ٣ مرات قراءة وبعدين جرب انك تجاوب على الاسئله إللى انت وضعتها بنفسك غيبا من غير ما تبص للشرح وبإذن الله هتجاوب كل الاسئله او معظمها وديما خلى فى بالك المقوله دى

"أنا بذاكر أول مرة عشان تانى مرة"

يعنى دى اول مرة تذاكر فيها الدرس ومخك مثلا استوعب ٥٠%من الدرس متقعدش بقى تندب حظك وانا بنسى وانا مش عارف اذاكر ...اطمن كدا كدا هتراجع الدرس مرة واتنين وتلاته وفى كل مرة مقدار استيعابك للدرس هيزيد بإذن الله 

وهتكمل بنفس الطريقه لحد ما تخلص فقرات الدرس كلها هتقرأ وتحط اسئله وتكرر بصوت عالى مع الشرح لنفسك بأسلوب مبسط 

لحد كدا انت تمام خالص 

حل الاسئله بعد المذاكرة: 

ودى بقى أهم خطوة تكاد تكون اهم من المذاكرة نفسها،لازم لازم لازم بعد ما تخلص مذاكرة الدرس تحل اسئله عليه وإلا مذاكرتك هتكون بدون فائده والله هتعمل ايه بقى تدخل تحل الاسئله وكل سؤال يصعب عليك حله تعلم عليه ومفيش مانع انك تشوف إجابته من الشرح بتاع الدرس عادى جدا وفى البدايه هتلاقى صعوبه فى حل الاسئله ولكن مع كثرة حل الاسئله هتلاقى الأفكار بتتكر وانت بقى عندك خبر فى التعامل مع اسئلة الدرس دا واحده واحده مع التكرار هتظبط الدنيا  

تعمل ايه لو درس معين عليه كم كبير من الاسئله:

احيانا بنلاقى كتب خارجيه عامله اسئله كتير جدا بعد كل درس والطالب طبعا مش هيكون عنده وقت يحل كل الاسئله دى وعندى بقى الحل السحرى تعمل ايه بقى !!!

هتحل الاسئله حسب عدد مرات مذاكرة الدرس يعنى اول مرة تذاكر فيها الدرس حل عليه الاسئله المرقمه بأرقام فرديه فقط، وتانى مرة تذاكر فيها الدرس المراجعه يعنى حل الاسئله المرقمه بأرقام زوجيه 

وبكدا هتكون حليت كل الاسئله بسهولة 

وبكدا اكون تقريبا قولت كل حاجه عن ازاى تذاكر الدرس بكل حاجه فيه ومتنساش ان دايما التوفيق من عند ربنا سبحانه وتعالى فاستعن بالله وأكثر من الدعاء